ఇంజనీరింగ్ పూర్తయిన ఎస్సీ, ఎస్టీ విద్యార్థులకు ప్రత్యేక శిక్షణ

అయితే దీన్ని ఎస్సీ, ఎస్టీలకే పరిమితం చేసింది. వృత్తి నైపుణ్యాన్ని మెరుగుపరిచేందుకు శిక్షణ ఇచ్చే నేషనల్ అకాడమీ ఆఫ్ కన్‌స్ట్రక్షన్ (న్యాక్) ఇందులో కీలక భూమిక పోషించనుంది. ఇప్పటివరకు స్కిల్ డెవలప్‌మెంట్ శిక్షణకే పరిమితమైన న్యాక్ తాజాగా ఎంటర్‌ప్రెన్యూయర్‌షిప్ తరగతులకు శ్రీకారం చుట్టబోతోంది. తొలివిడతలో ఇంజనీరింగ్ గ్రాడ్యుయేట్స్‌కు కాంట్రాక్టుల్లో నైపుణ్యం కల్పించనుంది.

మూడు నెలల శిక్షణ :
రోడ్లు, భవనాలు, ఇతర ప్రాజెక్టుల్లో కాంట్రాక్టులు పొందటంలో ఎస్సీ, ఎస్టీలను ప్రోత్సహించాలని ప్రభుత్వం గతంలోనే నిర్ణయించింది. తెలంగాణ ఆవిర్భవించిన తొలినాళ్లలోనే ప్రభుత్వం ఉత్తర్వు కూడా జారీ చేసింది. కానీ అది ఆచరణలోకి రాలేదు. ఇప్పుడు దాన్ని ప్రారంభించాలని నిర్ణయించింది. ఈ మేరకు న్యాక్‌కు ప్రత్యేక బాధ్యతలు అప్పగించింది. బీటెక్ పూర్తి అయిన ఎస్సీ, ఎస్టీ ఔత్సాహికులు ఈ కోర్సుల్లో చేరేందుకు అర్హులు. మూడు నెలల పాటు ప్రత్యేక శిక్షణ ద్వారా కాంట్రాక్టు పనులు నిర్వహించే విషయంలో వారికి న్యాక్ మెళకువలు నేర్పుతుంది. కోర్సు పూర్తి చేసుకున్న తర్వాత సొంతంగా కాంట్రాక్టులు పొందేందుకు వారికి అర్హత లభిస్తుంది. సాధారణంగా ఆర్థికంగా స్థితిమంతులే కాంట్రాక్టులను పొందటం కద్దు. కానీ దానితో సంబంధం లేకుండా పేద ఎస్సీ, ఎస్టీ యువకులు కాంట్రాక్టులు పొందేలా ప్రభుత్వం కొన్ని ప్రత్యేక వెసులుబాట్లు కల్పించనుంది. న్యాక్ ద్వారా శిక్షణ పొంది కాంట్రాక్టుల్లో పాల్గొనే వారికి ప్రత్యేక రాయితీలు ఇవ్వాలని నిర్ణయించింది. రుసుములు, ధరావతులు, ఇతర కొన్ని నిబంధనల నుంచి వారికి సడలింపు ఇవ్వాలని నిర్ణయించింది. తొలుత 200 మందితో ఓ బ్యాచ్‌ను త్వరలో న్యాక్ ప్రారంభించబోతోంది.