తెలంగాణలో ఎంసెట్ ఫలితాల తర్వాతే ‘ప్రైవేటు’ కౌన్సెలింగ్

దీనికి ప్రైవేటు కాలేజీలు కూడా అంగీకరించాయి. వాస్తవానికి ఎంసెట్-2 లీకేజీ నేపథ్యంలో మెడికల్ సీట్ల భర్తీ రాష్ట్రంలో ఆలస్యమైంది. అయితే ‘నీట్’ ఫలితాలు వెలువడిన నేపథ్యంలో యాజమాన్య కోటా సీట్లను భర్తీ చేసుకునేందుకు ప్రైవేటు కాలేజీలు రంగం సిద్ధం చేసుకున్నాయి. ఇందుకోసం ఈనెల రెండో వారంలోనే కౌన్సెలింగ్‌కు నోటిఫికేషన్ ఇవ్వాలని భావించాయి. కానీ దీనిపై విమర్శలు రావడం.. రాష్ట్ర ప్రవేశాలు, ఫీజు నియంత్రణ కమిటీ (ఏఎఫ్‌ఆర్సీ) జోక్యం చేసుకోవడంతో ప్రభుత్వం రంగంలోకి దిగింది. వైద్య ఆరోగ్యశాఖ మంత్రి లక్ష్మారెడ్డి తాజాగా ప్రైవేటు కాలేజీల యాజమాన్యాలతో చర్చించారు. ఎంసెట్-3 ఫలితాలు వెలువడ్డాకే యాజమాన్య కోటా సీట్లకు కౌన్సెలింగ్ నిర్వహించాలని ఆయన సూచించగా.. కాలేజీల యాజమాన్యాలు అంగీకరించాయి.

దీనితో ప్రయోజనం అంతంతే!
ఎంసీఐ నిబంధనల ప్రకారం దేశవ్యాప్తంగా సెప్టెంబర్ ఆఖరు నాటికి వైద్య కోర్సుల అడ్మిషన్ల ప్రక్రియ పూర్తికావా లి. అయితే రాష్ట్రంలో ఎం సెట్-3 పరీక్ష సెప్టెంబర్ 11న జరుగనుంది. ఆ ఫలితాలు ప్రకటించి, ర్యాంకులు వెల్లడించడం, కౌన్సెలింగ్ నోటిఫికేషన్, దరఖాస్తుల స్వీకరణ, సర్టిఫికెట్ల వెరిఫికేషన్ వంటి ప్రక్రియంతా గడువులోగా పూర్తవడం కష్టం. ఈ నేపథ్యంలో అడ్మిషన్ల గడువు పెంచాలని సుప్రీంకోర్టులో కాళోజీ నారాయణరావు ఆరోగ్య విశ్వవిద్యాలయం పిటిషన్ దాఖలు చేయనుంది. మరోవైపు ఎంసెట్-3 ఫలితాలు వెలువడగానే యాజమాన్య కోటా సీట్ల భర్తీకి రంగం సిద్ధమవుతోంది. సుప్రీం కోర్టు ఒకవేళ గడువు పెంచే అవకాశముంటే.. ముందే ప్రైవేటు కౌన్సెలింగ్‌కు ప్రభుత్వం ఎందుకు అవకాశమిస్తోందని విద్యార్థులు ప్రశ్నిస్తున్నారు. ప్రభుత్వ కాలేజీల్లోని సీట్లు, ప్రైవేటు కాలేజీల్లోని కన్వీనర్ కోటా సీట్లు భర్తీ అయ్యాకే... ప్రైవేటు కాలేజీల్లోని యాజమాన్య, ఎన్నారై కోటా సీట్లను భర్తీ చేయాలని అంటున్నారు. ఎంసెట్-3 ఫలితాలు ప్రకటించగానే కన్వీనర్ కోటాలో సీటు వస్తుందా, రాదా? అన్న విషయంపై స్పష్టత రాదని చెబుతున్నా రు. ఒకవేళ ప్రైవేటు సీటులో చేరాక సంబంధిత విద్యార్థికి ప్రభుత్వ కౌన్సెలింగ్‌లో సీటు వస్తే... ప్రైవేటు యాజమాన్యాలకు చెల్లించిన ఫీజును వెనక్కిచ్చేలా సర్కారు ఏర్పాట్లు చేస్తే విద్యార్థులు నష్టపోకుండా ఉంటారంటున్నారు.

సుప్రీం గడువు ఇవ్వకుంటే!
ఒకవేళ సుప్రీంకోర్టు గడువు పొడిగించకుంటే.. ఈ నెలాఖరులోగానే ఎలాగోలా కౌన్సెలింగ్ పూర్తిచేయాలని వైద్య ఆరోగ్యశాఖ భావిస్తోంది. సర్టిఫికెట్ల వెరిఫికేషన్ ప్రక్రియను రాత్రీపగలూ కొనసాగించాలని.. రెండు కౌన్సెలింగ్‌లతో అడ్మిషన్ల ప్రక్రియ పూర్తిచేయాలని యోచిస్తోంది. ఇక యాజమాన్య కోటా సీట్లను ఒకే కౌన్సెలింగ్‌తో భర్తీ చేస్తారు.