ఏపీలో ఎంసెట్‌కు గడువుకు ముందే 1.62 లక్షల దరఖాస్తులు

గత నెల మూడు నుంచి ఆన్‌లైన్ దరఖాస్తుల స్వీకరణ ప్రక్రియ ప్రారంభమవ్వగా మంగళవారం సాయంత్రానికి 1,62,056 దరఖాస్తులు అందినట్లు ఏపీ ఎంసెట్ కన్వీనర్ డాక్టర్ సాయిబాబు తెలిపారు. విద్యార్థినుల నుంచే అత్యధిక దరఖాస్తులు వచ్చాయని ఆయన వెల్లడించారు. దరఖాస్తు చేసిన వారిలో 82,832 మంది విద్యార్థినులు, 79,224 మంది విద్యార్థులు ఉన్నారు. ఇంజనీరింగ్‌కు పోటీగా మెడికల్ కోర్సుకూ దరఖాస్తులు భారీగా రావడం విశేషం. ఇలా ఉండగా ఇంజనీరింగ్, అగ్రి/మెడికల్‌కు సంబంధించి 23,549 మంది తెలంగాణ నుంచి దరఖాస్తు చేశారని ఎంసెట్ కన్వీనర్ సాయిబాబు తెలిపారు. కాగా, అత్యధిక దరఖాస్తులు ఆంధ్రా వర్సిటీ పరిధి నుంచి అందాయి. ఏయూ పరిధిలో 86,219 మంది, శ్రీవెంకటేశ్వర యూనివర్సిటీ పరిధిలో 48,321 మంది, ఉస్మానియా వర్సిటీ నుంచి 23,549 మంది దరఖాస్తు చేశారు. అపరాధ రుసుము లేకుండా చివరి తేదీ ఈ నెల 21 కాగా, రూ.500 అపరాధ రుసుముతో ఏప్రిల్ 2, రూ.వెయ్యితో ఏప్రిల్ 11, రూ.5 వేలతో ఏప్రిల్ 19, రూ.10 వేలతో ఏప్రిల్ 27 వరకు దరఖాస్తు చేయొచ్చు.