8 నుంచి ‘ఎంసెట్’ ధ్రువపత్రాల పరిశీలన

సాక్షి అమరావతి: ఆంధ్రప్రదేశ్‌లో ఈ నెల 8 నుంచి ప్రారంభం కానున్న ఎంసెట్ కౌన్సెలింగ్ ప్రక్రియలో భాగంగా ఎంపీసీ విభాగానికి గానూ అభ్యర్థుల ధ్రువపత్రాల పరిశీలనకు రాష్ట్ర వ్యాప్తంగా 35 కేంద్రాలను ఏర్పాటుచేశారు. దీనికి సంబంధించిన వివరాలు https://apeamcet.nic.in వెబ్‌సైట్‌లో ఉన్నాయి. అభ్యర్థులు ఏ కేంద్రానికై నా వెళ్లి ధ్రువపత్రాలను పరిశీ లింపచేసుకోవచ్చని కౌన్సెలింగ్ కన్వీనర్ పండాదాస్ పేర్కొన్నారు. దివ్యాంగులు, ఎన్‌సీసీ, సీఏపీ, స్పోర్ట్సు, గేమ్స్, ఆంగ్లో ఇండియన్ కేటగిరీలకు సంబంధించిన అభ్యర్థులు మాత్రం విజయవాడ బెంజ్‌సర్కిల్‌లోని ప్రభుత్వ పాలిటెక్నిక్ కాలేజీలో ఏర్పాటుచేసిన పరిశీలన కేంద్రంలో హాజరుకావాలి. వీరికి 8 నుంచి 15 వరకు ధ్రువపత్రాల పరిశీలన ఉంటుంది. వీరు హాజరు కావాల్సిన తేదీలు వెబ్‌సైట్‌లో ప్రత్యేకంగా పొందు పరిచారు. ఓసీ, బీసీ, ఎస్సీ, మైనార్టీ కేటగిరీల వారికి ధ్రువ పత్రాల పరిశీలన జూన్ 8 నుంచి 17 వరకు ఉంటుంది.