Sakshi Education

సాక్షి ఎడ్యుకేషన్: భారత సైన్యంలో ఒక చారిత్రాత్మక ఘట్టం ఆరంభమైంది. 15 నెలల నిరీక్షణకు తెరదించుతూ, అమెరికాకు చెందిన ఏహెచ్‌-64ఈ అపాచీ అటాక్ హెలికాప్టర్లు భారత్‌కు చేరుకున్నాయి. ప్రపంచంలోనే అత్యంత అధునాతన మల్టీరోల్ కంబాట్ హెలికాప్టర్లుగా పేరుగాంచిన అపాచీలు భారత రక్షణ సామర్థ్యాన్ని అసాధారణంగా పెంచుతాయి. ప్రధానంగా భారత-పాకిస్తాన్ సరిహద్దుల్లో ఉగ్రవాద కార్యకలాపాలను కట్టడి చేయడంలో ఇవి కీలక పాత్ర పోషించనున్నాయి, శత్రువుల గుండెల్లో వణుకు పుట్టించడం ఖాయమని నిపుణులు అభిప్రాయపడుతున్నారు.

India deploys AH-64E Apache for border security Indian Army receives Apache attack helicopters Key Features of Indian Army's New Apache Helicopters and How Apache Helicopters Boost India's Military Migh

అపాచీ రాకతో భారత సైన్యానికి కొత్త బలం
రాక & మోహరింపు...

మొదటి విడతలో భాగంగా మూడు ఏహెచ్‌–64ఈ అపాచీ హెలికాప్టర్లు అమెరికా మిలటరీ సరుకు రవాణా విమానంలో ఉత్తరప్రదేశ్‌లోని ఘజియాబాద్‌లోని హిండన్‌ ఎయిర్‌బేస్‌కు చేరుకున్నాయి.
ఎడారి రంగులో ఉన్న ఈ అత్యాధునిక హెలికాప్టర్లను రాజస్థాన్‌లోని జైపూర్‌లో మోహరించనున్నారు.

చరిత్ర సృష్టించిన ఒప్పందం...

మొత్తం ఆరు అపాచీ హెలికాప్టర్ల కోసం భారత ప్రభుత్వం అమెరికా సర్కార్‌తోపాటు బోయింగ్‌ లిమిటెడ్‌తో రూ.4,168 కోట్ల విలువైన ఒప్పందం కుదుర్చుకుంది.

సరఫరా ప్రణాళిక...

బోయింగ్ సంస్థ మిగిలిన మూడు హెలికాప్టర్లను ఈ ఏడాది (2025) చివరి కల్లా అందించనుంది.
భారత వైమానిక దళానికి (IAF) ఇప్పటికే 22 'ఈ–మోడల్‌' అపాచీలను బోయింగ్ అందజేసినప్పటికీ, భారత సైన్యానికి ఏహెచ్‌–64ఈ అపాచీలను సరఫరా చేయడం ఇదే మొదటిసారి.

అపాచీ తో శత్రుదేశాలపై నిప్పుల వాన...

అపాచీ అటాక్‌ హెలికాప్టర్లు తమ ఆయుధ సంపత్తి, సాంకేతిక సామర్థ్యాలతో శత్రువులపై నిప్పుల వాన కురిపించి, తుత్తునియలు చేయగలవు.

అపాచీ హెలికాప్టర్ల ప్రత్యేకతలివే...!

బహుళ ఆయుధ వ్యవస్థ: ఏహెచ్‌–64ఈ అపాచీ అటాక్‌ హెలికాప్టర్లలో తుపాకులు, రాకెట్లు, క్షిపణుల వంటి అనేక రకాల ఆయుధాలు అమర్చారు.
30 ఎంఎం ఎం230 చైన్‌ గన్: నిమిషానికి 625 రౌండ్లు పేల్చగలదు, ఇది శత్రు దళాలపై నిరంతర కాల్పులకు ఉపయోగపడుతుంది.
70 ఎంఎం హైడ్రా రాకెట్లు: తక్కువ దూరంలోని లక్ష్యాలపై కచ్చితత్వంతో దాడి చేయడానికి అనుకూలం.
ఏజీఎం–114 హెల్‌ఫైర్‌ క్షిపణులు: ఇవి భూమిపై ఆరు కిలోమీటర్ల దూరంలోని సాయుధ వాహనాలు, యుద్ధ ట్యాంకులను సైతం సమర్థంగా ధ్వంసం చేయగలవు.
స్ట్రింగర్‌ మిస్సైళ్లు: గగనతలం నుంచి గగనతలంలోకి ప్రయోగించే ఈ క్షిపణులతో గాలిలో ప్రయాణిస్తుండగానే శత్రుదేశాల హెలికాప్టర్లు, మానవ రహిత వాహనాలను (డ్రోన్లను) కూల్చేయవచ్చు.
వేగం & పరిధి: ఈ హెలికాప్టర్లు గంటకు 365 కిలోమీటర్ల వేగంతో ప్రయాణిస్తాయి, 480 కిలోమీటర్ల పరిధిలో సమర్థవంతంగా పనిచేయగలవు.

రూపొందించిన సంస్థ...

ఈ అద్భుతమైన హెలికాప్టర్లను అమెరికాకు చెందిన బోయింగ్‌ సంస్థ రూపొందించింది.
ఆలస్యం ఎందుకంటే: ఒప్పందం ప్రకారం 2024 మార్చిలోనే రావాల్సి ఉండగా, కొన్ని సాంకేతిక కారణాలతో సుమారు 15 నెలల జాప్యం జరిగింది.

అత్యాధునిక టార్గెటింగ్‌ వ్యవస్థలు...

అడ్వాన్స్‌డ్‌ టార్గెటింగ్‌ సిస్టమ్స్‌తో కూడిన అపాచీలు భూ ఉపరితలంపై మరియు ఆకాశంలో శత్రువుల ఉనికిని కచ్చితత్వంతో గుర్తించి, దాడి చేయడంలో తిరుగులేనివి.
అన్ని వాతావరణ పరిస్థితుల్లో పనితీరు: పగలు, రాత్రి, వర్షం, దుమ్ము, పొగ వంటి అన్ని రకాల భౌగోళిక మరియు వాతావరణ పరిస్థితుల్లోనూ సమర్థంగా పనిచేయగల సెన్సార్లు మరియు టార్గెటింగ్‌ వ్యవస్థలు ఇందులో ఉన్నాయి.
దృఢమైన నిర్మాణం: సంక్లిష్టమైన యుద్ధ వాతావరణాల్లోనూ సమర్థంగా పనిచేసే విధంగా దృఢంగా నిర్మితమయ్యాయి. చిన్నపాటి ఆయుధాలు ప్రయోగించినా ఏమాత్రం చెక్కుచెదరకుండా శత్రువుల దాడిని తట్టుకుంటాయి.
సిబ్బంది సౌలభ్యం: అపాచీలో ఇద్దరు ప్రయాణించవచ్చు – ఒకరు పైలట్‌గా వ్యవహరిస్తే, మరొకరు ఆయుధ వ్యవస్థను నియంత్రిస్తారు. ఇది సమన్వయంతో కూడిన దాడులకు వీలు కల్పిస్తుంది.
సైన్యంలో నిరూపితమైన సామర్థ్యం: అపాచీ హెలికాప్టర్లు అమెరికా సైన్యంలో గత 40 ఏళ్లుగా విజయవంతంగా సేవలందిస్తున్నాయి. 1980వ దశకం తర్వాత అనేక కీలకమైన ఆపరేషన్లలో పాల్గొని తమ విశ్వసనీయత, ప్రభావశీలతను ప్రపంచానికి నిరూపించుకున్నాయి.

భారత సైన్యంలో అపాచీ హెలికాప్టర్ల రాక దేశ రక్షణ సామర్థ్యాన్ని మరింత పటిష్టం చేస్తుంది. ఈ అధునాతన హెలికాప్టర్లు సరిహద్దుల్లో సైనిక ఆపరేషన్లకు, ముఖ్యంగా ఉగ్రవాద కార్యకలాపాలను కట్టడి చేయడానికి ఎంతగానో తోడ్పడతాయి. భారత సైనిక దళాల పోరాట సామర్థ్యం మరింత పెరుగుతుందని భావిస్తున్నారు.

ఇదీ కూడా చదవండి..

KHARIF : ఖరీఫ్ పంటల సాగు విస్తీర్ణం 2025లో సానుకూల ధోరణి..!

July 23rd Current Affairs in Telugu: జులై 23వ తేదీ కరెంట్ అఫైర్స్ లైవ్ అప్‌డేట్స్ ఇవే..

పోటీపరీక్షలకు ఉపయోగపడే MCQs

1. భారత సైన్యంలోకి ప్రవేశించిన ఏహెచ్‌–64ఈ అపాచీ హెలికాప్టర్లను ఏ దేశానికి చెందిన సంస్థ రూపొందించింది?
ఎ) రష్యా
బి) ఫ్రాన్స్
సి) అమెరికా
డి) ఇజ్రాయెల్
జవాబు: సి) అమెరికా

2. అపాచీ హెలికాప్టర్లను భారత సైన్యంలో మొదటి విడతలో భాగంగా ఎక్కడ మోహరించనున్నారు?
ఎ) హైదరాబాద్
బి) జైపూర్
సి) బెంగళూరు
డి) లక్నో
జవాబు: బి) జైపూర్

3. అపాచీ హెలికాప్టర్లలో అమర్చిన భూమిపై లక్ష్యాలను ధ్వంసం చేయగల క్షిపణుల పేరు ఏమిటి?
ఎ) స్ట్రింగర్ క్షిపణులు
బి) ఆర్-73 క్షిపణులు
సి) ఏజీఎం–114 హెల్‌ఫైర్‌ క్షిపణులు
డి) ఆకాష్ క్షిపణులు
జవాబు: సి) ఏజీఎం–114 హెల్‌ఫైర్‌ క్షిపణులు

4. అపాచీ హెలికాప్టర్ల మొత్తం ఒప్పంద విలువ సుమారు ఎంత?
ఎ) రూ. 2,000 కోట్లు
బి) రూ. 3,500 కోట్లు
సి) రూ. 4,168 కోట్లు
డి) రూ. 5,000 కోట్లు
జవాబు: సి) రూ. 4,168 కోట్లు

5. అపాచీ హెలికాప్టర్లలో గాలిలో ప్రయాణిస్తుండగానే శత్రుదేశాల హెలికాప్టర్లు/డ్రోన్లను కూల్చేయగల క్షిపణుల పేరు ఏమిటి?
ఎ) 70 ఎంఎం హైడ్రా రాకెట్లు
బి) స్ట్రింగర్ మిస్సైళ్లు
సి) 30 ఎంఎం ఎం230 చైన్ గన్
డి) హెల్‌ఫైర్‌ క్షిపణులు
జవాబు: బి) స్ట్రింగర్ మిస్సైళ్లు

☛ Follow our YouTube Channel (Click Here)

☛ Follow our Instagram Page (Click Here)

☛ Join our WhatsApp Channel (Click Here)

☛ Join our Telegram Channel (Click Here)

Published date : 23 Jul 2025 12:43PM