జియో ప్లాట్‌ఫామ్స్‌లో విస్టా 2.32 శాతం వాటాలు కొనుగోలు చేస్తోంది. ఈ డీల్‌ విలువ రూ. 11,367 కోట్లు. దీంతో మూడు వారాల కన్నా తక్కువ వ్యవధిలో జియో ప్లాట్‌ఫామ్స్‌ ఏకంగా రూ. 60,596 కోట్లు సమీకరించినట్లయింది. ఈ పెట్టుబడులతో జియో ప్లాట్‌ఫామ్స్‌లో రిలయన్స్‌ ఇండస్ట్రీస్, ఫేస్‌బుక్‌ తర్వాత విస్టా మూడో అతి పెద్ద ఇన్వెస్టరుగా ఉంటుంది. సోషల్‌ నెట్‌వర్కింగ్‌ సైట్‌ ఫేస్‌బుక్‌ ఇప్పటికే రూ. 43,574 కోట్లతో 9.99 శాతం, మరో టెక్‌ ఇన్వెస్ట్‌మెంట్‌ దిగ్గజం సిల్వర్‌ లేక్‌ రూ. 5,666 కోట్లతో 1.15 శాతం వాటా కొనుగోలు చేసిన సంగతి తెలిసిందే. తాజా డీల్‌ ప్రకారం జియో ప్లాట్‌ఫామ్స్‌ ఎంటర్‌ప్రైజ్‌ విలువ రూ. 5.16 లక్షల కోట్లుగా ఉంటుంది.