ఈ దుర్ఘటనలో అస్వస్థతకు గురై కేజీహెచ్‌లో చికిత్స పొందుతున్నవారిని ఆయన మే 7న పరామర్శించారు. ఈ ఘ‌ట‌న‌పై ఉన్నతాధికారులతో సమీక్ష నిర్వహించారు. అనంత‌రం ముఖ్యమంత్రి మాట్లాడుతూ... ఈ ఘ‌ట‌న కార‌ణంగా చనిపోయిన ప్రతి కుటుంబానికి రూ.కోటి చొప్పున ఆర్థికసాయం అందచేస్తాం. వెంటిలేటర్‌పై చికిత్స పొందుతున్న వారందరికీ రూ.10 లక్షలు, బాధిత గ్రామాల్లోని 15 వేలమందికి ఒక్కొక్కరికి రూ.10 వేలు అంద‌జేస్తాం. జంతు నష్టం జరిగిన వారిని ఆదుకుంటాం. రెండు మూడు రోజులు వైద్యం అవసరమైన వారికి రూ.లక్ష, ప్రాథమిక చికిత్స చేయించుకున్న వారికి రూ.25 వేలు, ఒక్కో జంతువుకు రూ.25 వేల నష్టపరిహారం అందిస్తాం. ఎల్జీ కంపెనీలో బాధిత కుటుంబాలకు ఉద్యోగాలు కల్పిస్తాం అని ప్రక‌టించారు.