తొలి స్వదేశీ పిస్తోల్ రెడీ చేసిన ప్రభుత్వం సంస్థ ఏది?

భారత సైన్యంతో కలసి డీఆర్‌డీవోకు చెందిన ఆర్మమెంట్ రీసెర్చ్ అండ్ డెవలప్‌మెంట్ ఎస్టాబ్లిష్‌మెంట్ (పుణే) విభాగం పూర్తి స్వదేశీ సాంకేతిక పరిజ్ఞానంతో తొలి 9 ఎంఎం మెషీన్ పిస్తోల్‌ను అభివృద్ధి చేసింది. దీనికి ‘అస్మి’అనే పేరు పెట్టారు. ఈ సరికొత్త పిస్తోల్‌ను కేవలం నాలుగు నెలల్లోనే అభివృద్ధి చేయడం విశేషం. విమానాల తయారీలో వాడే అల్యూమినియంతో ఈ పిస్తోల్ పైభాగంలోని రిసీవర్‌ను, కార్బన్ ఫైబర్‌తో దిగువ రిసీవర్‌ను తయారు చేశారు. ఆర్మీ అధికారుల వ్యక్తిగత ఆయుధాల కేటగిరీలో అస్మి కీలకపాత్ర పోషించనుంది. కేంద్ర, రాష్ట్ర పోలీస్ బలగాలకు, వీఐపీ రక్షణ విధులు నిర్వర్తించే వారికి ఈ ఆయుధం ఎంతో ఉపయోగపడుతుందని, ఒక్కోదాని తయారీకి రూ.50 వేలకంటే ఎక్కువ ఖర్చు కాదని డీఆర్‌డీవో ఒక ప్రకటనలో తెలిపింది.