టి20 లీగ్‌లకు రిటైర్మెంట్ ఇచ్చిన ఆసీస్ క్రికెటర్?

Sakshi Education

ఆస్ట్రేలియా ప్లేయర్ షేన్ వాట్సన్ టి20 క్రికెట్ టోర్నమెంట్‌లకు నవంబర్ 2న వీడ్కోలు పలికాడు.

2016లోనే అంతర్జాతీయ క్రికెట్ నుంచి వీడ్కోలు తీసుకున్న 39 ఏళ్ల వాట్సన్ ప్రపంచ వ్యాప్తంగా జరుగుతున్న టి20 క్రికెట్ టోర్నమెంట్‌లలో ఆయా ఫ్రాంచైజీలకు ఆడుతున్నాడు. ఐపీఎల్‌లో భాగంగా నవంబర్ 1న సీఎస్‌కే, పంజాబ్ మధ్య జరిగిన్ మ్యాచ్‌లో చెన్నై సూపర్ కింగ్‌‌స (సీఎస్‌కే) తరఫున చివరి లీగ్ ఆడాడు. ఈ మ్యాచ్‌లో పంజాబ్‌పై సీఎస్‌కే విజయం సాధించింది. 2018 నుంచి ఓపెనర్‌గా చెన్నై విజయాల్లో వాట్సన్ కీలకంగా వ్యవహరించాడు.

8,821 పరుగులు...
ఇండియన్ ప్రీమియర్ లీగ్ (ఐపీఎల్)లో చెన్నై కన్నా ముందు రాజస్తాన్ రాయల్స్, రాయల్ చాలెంజర్స్ బెంగళూరుకు వాట్సన్ ప్రాతినిధ్యం వహించాడు. ఐపీఎల్‌లోనే కాకుండా కరీబియన్ ప్రీమియర్ లీగ్, బంగ్లాదేశ్ ప్రీమియర్ లీగ్, పాకిస్తాన్ సూపర్‌లీగ్, బిగ్‌బాష్ లీగ్‌లలో కూడా వాట్సన్ బరిలోకి దిగాడు. ఓవరాల్‌గా వాట్సన్ తన టి20 కెరీర్‌లో 343 మ్యాచ్‌లు ఆడి 8,821 పరుగులు చేశాడు. ఇందులో 6 సెంచరీలు, 53 అర్ధ సెంచరీలు ఉన్నాయి. 216 వికెట్లు కూడా పడగొట్టిన వాట్సన్ 101 క్యాచ్‌లు తీసుకున్నాడు.

క్విక్ రివ్యూ :
ఏమిటి : టి20 క్రికెట్ టోర్నమెంట్‌లకు వీడ్కోలు
ఎప్పుడు : నవంబర్ 2
ఎవరు : ఆస్ట్రేలియా ప్లేయర్ షేన్ వాట్సన్

Published date : 03 Nov 2020 05:58PM