రూ. 50 వేల వరకు పంట రుణాలను మాఫీ చేయనున్న రాష్ట్రం?

Sakshi Education

ఇప్పటివరకు రూ.25 వేల లోపు పంట రుణాలను మాఫీ చేసిన తెలంగాణ రాష్ట్ర ప్రభుత్వం... కరోనా కారణంగా నిలిచిపోయిన ఈ ప్రక్రియను పునరుద్ధరించాలని నిర్ణయించింది.

2021, ఆగస్టు 15 నుంచి నెలాఖరులోగా రూ.50 వేల వరకున్న పంట రుణాలను మాఫీ చేయాలని రాష్ట్ర మంత్రివర్గం నిర్ణయించింది. ముఖ్యమంత్రి కె.చంద్రశేఖర్‌రావు అధ్యక్షతన ఆగస్టు 1న ప్రగతిభవన్‌లో సమావేశమైన మంత్రివర్గం ఈ మేరకు పలు కీలక నిర్ణయాలు తీసుకుంది. రూ.25 వేల వరకున్న రుణాల మాఫీతో ఇప్పటికే 3 లక్షల పై చిలుకు రైతులు ప్రయోజనం పొందగా, తాజాగా కేబినెట్‌ తీసుకున్న నిర్ణయంతో ఈ సంఖ్య 9 లక్షలకు పెరగనుంది.

మరికొన్ని కేబినెట్‌ నిర్ణయాలు...

రూ.8 లక్షల లోపు వార్షిక ఆదాయం గల అగ్ర కుల పేదలకు విద్య, ఉద్యోగాల్లో 10 శాతం ఈడబ్ల్యూఎస్‌ కోటాను వర్తింప జేయాలి.
కరోనాతో తల్లిదండ్రులను కోల్పోయి అనాథలైన పిల్లలు పెద్దవారై ప్రయోజ కులయ్యే వరకు ప్రభుత్వం ఆశ్రయం కల్పించి అండగా నిలవాలి.
తెలంగాణ దళిత బంధు పథకాన్ని 2021, ఆగస్టు 16 నుంచి హుజూరాబాద్‌ నియోజకవర్గంలో పైలట్‌ ప్రాజెక్టుగా ప్రారంభించాలి.
దళిత పారిశ్రామికవేత్తలను ప్రోత్సహించేందుకు ప్రతి జిల్లాలో ‘సెంటర్‌ ఫర్‌ దళిత్‌ ఎంటర్‌ ప్రైజ్‌’ ఏర్పాటు చేయాలి.
గచ్చిబౌలిలోని టిమ్స్‌ ఆస్పత్రితో పాటు హైదరాబాద్‌లో కొత్తగా ఏర్పాటు చేయనున్న మూడు సూపర్‌ స్పెషాలిటీ ఆస్పత్రులకు ‘తెలంగాణ ఇన్‌స్టిట్యూట్‌ ఆఫ్‌ మెడికల్‌ సైన్సెస్‌(టిమ్స్‌)’గా నామకరణం చేయాలి.
ధోభీ ఘాట్లు, సెల్లూనకు నెలకు 250 యూనిట్ల ఉచిత విద్యుత్‌ సరఫరా పథకాన్ని వారంలోగా సంపూర్ణంగా అమలు చేయాలి.
నల్లగొండ జిల్లాకు సాగు, తాగునీరు అందించేందుకు శ్రీశైలం ఎడమగట్టు నుండి ప్రారంభించిన ఎస్సెల్బీసీ సొరంగమార్గం పనులను పున:ప్రారంభించాలి.

క్విక్‌ రివ్యూ :
ఏమిటి : రూ. 50 వేల వరకు పంట రుణాలను మాఫీ చేయాలని నిర్ణయం
ఎప్పుడు : ఆగస్టు 1
ఎవరు : తెలంగాణ రాష్ట్ర మంత్రివర్గం
ఎందుకు : తెలంగాణ రాష్ట్ర రైతుల ఆర్థిక పరిస్థితిని మెరుగుపరించేందుకు...

Published date : 02 Aug 2021 06:02PM