ప్రపంచంలోనే అత్యంత ఎత్తైన రైల్వే బ్రిడ్జ్‌ని ఎక్కడ నిర్మిస్తున్నారు?

Sakshi Education

ప్రపంచంలోనే అత్యంత ఎత్తైన రైల్వే బ్రిడ్జ్‌ని జమ్మూకశ్మీర్‌లోని ఉధంపుర్‌–శ్రీనగర్‌–బారాముల్లా రైల్‌ లింక్‌ ప్రాజెక్టు(యూఎస్‌బీఆర్‌ఎల్‌ ప్రాజెక్టు)లో భాగంగా చీనాబ్‌ నదిపై నిర్మిస్తున్నారు.

ఈ వంతెనకి సంబంధించిన ఆర్చ్‌ నిర్మాణం ఏప్రిల్‌ 5న పూర్తయిందని భారతీయ రైల్వే ప్రకటించింది. దీంతో వంతెన నిర్మాణం దాదాపు పూర్తికావచ్చిందని తెలిపింది. కశ్మీర్‌ లోయను ఇతర ప్రాంతాలతో కలిపేందుకు ఉద్దేశించిన ఈ బ్రిడ్జ్‌ నిర్మాణానికి దాదాపు రూ. 1486 కోట్లు ఖర్చు చేస్తున్నారు. ప్రస్తుతం రైల్వే శాఖ మంత్రిగా పీయూష్‌ గోయల్, రైల్వే బోర్డు చైర్మన్, సీఈవోగా అశుతోష్‌ అగర్వాల్‌ ఉన్నారు.

వంతెన ప్రత్యేకతలు

కశ్మీర్‌ లోయను మిగతా దేశంతో కలపడానికి వీలుగా రైల్వేశాఖ రూ.27,949 కోట్లతో ఉధంపుర్‌–శ్రీనగర్‌–బారాముల్లా రైల్వే ప్రాజెక్టు చేపడుతోంది. అందులో భాగంగా రూ.1,486 కోట్ల వ్యయంతో ఈ వంతెనను నిర్మిస్తోంది.
వంతెన పొడవు: 1.315 కిలోమీటర్లు.
పారిస్‌లోని ఈఫిల్‌ టవర్‌ కన్నా ఈ బ్రిడ్జ్‌ 35 మీటర్ల ఎత్తులో ఉంది.
చీనాబ్‌ నదీ ఉపరితలం నుంచి 359 మీటర్ల ఎత్తులో ఉంది.
2004లోనే దీని నిర్మాణ పనులు ప్రారంభం కాగా, మధ్యలో 2009లో నిలిచిపోయాయి.
2017 నుంచి వంతెనపై ఆర్చ్‌ను ఏర్పాటు చేయడం ప్రారంభించారు. ఈ ఆర్చ్‌ పొడవు 467 మీటర్లు, బరువు 10619 మెట్రిక్‌ టన్నులు.
28660 మెట్రిక్‌ టన్నుల ఇనుము, 66వేల క్యూబిక్‌ మీటర్ల కాంక్రీట్‌ను వాడారు.
266 కిలోమీటర్ల వేగంతో వీచే గాలులను కూడా తట్టుకునేలా వంతెనను డిజైన్‌ చేశారు.
నిర్మాణంలో ‘టెక్లా’ సాఫ్ట్‌వేర్‌ను ఉపయోగించి డిటైలింగ్‌ చేశారు.
నిర్మాణంలో వినియోగించిన స్టీల్‌ –10 నుంచి + 40 డిగ్రీల సెల్సియస్‌ ఉష్ణోగ్రత వరకు తట్టుకోగలదు.
అర్ధచంద్రాకారంలో ఉండే ఈ ఉక్కు వంతెన నిర్మాణం.. భారతీయ రైల్వే ఎదుర్కొన్న అతిపెద్ద సివిల్‌ ఇంజినీరింగ్‌ సవాల్‌.
వంతెనలో ప్రధానమైన ఆర్చి 467 మీటర్లు ఉంటుంది. దానిపైన వంతెన పొడవు 1,315 మీటర్లు ఉంటుంది.

క్విక్‌ రివ్యూ :
ఏమిటి : ప్రపంచంలోనే అత్యంత ఎత్తైన రైల్వే బ్రిడ్జ్‌ని ఎక్కడ నిర్మిస్తున్నారు?
ఎప్పుడు : ఏప్రిల్‌ 5
ఎవరు : భారతీయ రైల్వే
ఎక్కడ : చీనాబ్‌ నది, జమ్మూకశ్మీర్‌
ఎందుకు : కశ్మీర్‌ లోయను మిగతా దేశంతో కలపడానికి వీలుగా

Published date : 06 Apr 2021 06:19PM