మహిళల భద్రతకు అభయ్ వాహనాలు

Sakshi Education

ఆంధ్రప్రదేశ్‌లోని ప్రకాశం జిల్లాలో రాత్రి వేళల్లో ప్రయాణించే మహిళలను సురక్షితంగా గమ్యస్థానాలకు చేర్చేందుకు ‘అభయ్’ పేరుతో వాహనాలు ఏర్పాటు చేశారు.

ఈ వాహనాలను ప్రకాశం జిల్లా ఎస్పీ సిద్ధార్థ్ కౌశల్ డిసెంబర్ 4న ఒంగోలులో ప్రారంభించారు. రాత్రి 9 గంటల నుంచి తెల్లవారుజాము 5 గంటల వరకు జిల్లాలో ఎనిమిది వాహనాలు (నాలుగు చక్రాలు) మహిళల రక్షణకు అందుబాటులో ఉంటాయి. ప్రైవేటు వాహనాలను నమ్మలేని పరిస్థితుల్లో, అత్యవసర సమయాల్లో డయల్-100కు ఫోన్ చేసి మహిళలు అభయ్ వాహనాల సేవలను వినియోగించుకోవచ్చు. వాహనంలో డ్రైవర్‌తో పాటు ఓ మహిళా కానిస్టేబుల్ కూడా ఉంటారు. జిల్లా వ్యాప్తంగా అత్యవసరంగా సేవలందించేందుకు 70 ద్విచక్ర వాహనాలను సైతం ఏర్పాటు చేశారు. దేశవ్యాప్తంగా మహిళలపై జరుగుతున్న వరుస దుర్ఘటనల నేపథ్యంలో ఎస్పీ సిద్ధార్థ్ కౌశల్ ఈ కార్యక్రమానికి శ్రీకారం చుట్టారు.

లూథియానాలోనూ...
పంజాబ్‌లోని లూథియానా పోలీసులు కూడా రాత్రి వేళల్లో ప్రయాణించే మహిళలు, యువతుల కోసం డిసెంబర్ 1 నుంచి నుంచి కొత్త సర్వీసు ప్రారంభించారు.

క్విక్ రివ్యూ :
ఏమిటి : అభయ్ పేరుతో వాహనాలు ప్రారంభం
ఎప్పుడు : డిసెంబర్ 4
ఎవరు : ప్రకాశం జిల్లా ఎస్పీ సిద్ధార్థ్ కౌశల్
ఎక్కడ : ఒంగోలు, ప్రకాశం జిల్లా
ఎందుకు : రాత్రి వేళల్లో ప్రయాణించే మహిళలను సురక్షితంగా గమ్యస్థానాలకు చేర్చేందుకు

Published date : 05 Dec 2019 05:44PM