క‌రోనాపై పోరుకు పీఎం కేర్స్‌ ఫండ్ ఏర్పాటు

ప్రధానమంత్రి ఛైర్మన్‌గా ఉండే ఈ ట్రస్ట్ లో రక్షణ, హోం, ఆర్థిక శాఖల మంత్రులు స‌భ్యులుగా ఉంటార‌ని మార్చి 28న కేంద్ర ప్ర‌భుత్వం వెల్ల‌డించింది. ఈ ఫండ్‌ చిన్న చిన్న విరాళాలను కూడా అనుమతిస్తుంది. పౌరులు లేదా సంస్థలు పీఎం ఇండియా డాట్‌ జీఓవీ డాట్‌ ఇన్‌ వెబ్‌సైట్‌ ద్వారా పై వివరాలను ఉపయోగించి పి.ఎం. కేర్స్‌ ఫండ్‌కు విరాళాలు అందించవచ్చు.

టాటా గ్రూప్ విరాళం రూ. 1,500కోట్లు..
కరోనాపై యుద్ధానికి టాటా గ్రూప్ మార్చి 28న‌ భారీ విరాళం ప్రకటించింది. రూ.500 కోట్లు ఇవ్వనున్నట్లు తొలుత టాటా ట్రస్టు వెల్లడించింది.అనంతరం రూ.1,000 కోట్ల విరాళాన్ని ‘టాటా సన్స్‌’ చైర్మన్‌ ఎన్‌.చంద్రశేఖరన్‌ ప్రకటించారు. దీంతో టాటా గ్రూప్‌ మొత్తం రూ.1,500 కోట్ల విరాళం ప్రక‌టించిన‌ట్లయింది.