కోవిడ్‌ టెస్టుల్లో ఏపీ టాప్‌..

దేశంలో ఎక్కువ ఆర్టీపీసీఆర్‌ టెస్టులు చేస్తున్న రాష్ట్రాల్లో ఆంధ్రప్రదేశ్‌కు రెండోస్థానం దక్కింది. ఖర్చు ఎక్కువైనా రాష్ట్ర ప్రభుత్వం ఆర్టీపీసీఆర్‌ టెస్టులకే అధిక ప్రాధాన్యత ఇస్తోంది. ఆగస్టు 10వ తేదీ వరకు దేశవ్యాప్తంగా వివిధ రాష్ట్రాల్లో జరిగిన మొత్తం ఆర్టీపీసీఆర్‌ టెస్టుల్లో తమిళనాడు తర్వాత అత్యధిక టెస్టులు చేస్తున్న రాష్ట్రం ఏపీనే. తమిళనాడులో 99 శాతం టెస్టులు ఆర్టీపీసీఆర్‌ పద్ధతిలో జరుగుతుండగా.. ఏపీలో 97 శాతం ఆర్టీపీసీఆర్‌ టెస్టులు జరుగుతున్నట్టు వెల్లడైంది. కేరళ వంటి రాష్ట్రాలు సైతం నేటికీ ర్యాపిడ్‌ యాంటిజెన్‌ టెస్టుల పైనే ఆధారపడుతున్నాయి. మన రాష్ట్రంలో కోవిడ్‌ వ్యాప్తి చెందే నాటికి ఒక్క వైరాలజీ ల్యాబొరేటరీ కూడా లేదు. అలాంటిది 13 జిల్లాల్లో 14 వైరాలజీ ల్యాబొరేటరీలు యుద్ధ ప్రాతిపదికన ఏర్పాటు చేయడం వల్లే పెద్ద సంఖ్యలో ఆర్టీపీసీఆర్‌ టెస్టులు చేయగలుగుతున్నారు.

పాజిటివిటీ తగ్గింది..
ఆగస్టు 3 నుంచి 9వ తేదీ వరకూ దేశంలో 10 శాతం అంతకంటే ఎక్కువ పాజిటివిటీ రేటు ఉన్న 45 జిల్లాలను గుర్తించారు. ఇందులో ఏపీకి సంబంధించిన జిల్లాలు లేవు. అంతేకాదు 5 నుంచి 10 శాతం లోపు పాజిటివిటీ రేటు ఉన్న 37 జిల్లాలను గుర్తించగా.. అందులోనూ ఒకే ఒక్క జిల్లా ఉంది. అది కూడా తూర్పుగోదావరి జిల్లాలో 7.25 శాతం మాత్రమే పాజిటివిటీ ఉన్నట్టు వెల్లడైంది. దేశంలోని చాలా జిల్లాల్లో 7 నుంచి 9 వరకూ పాజిటివిటీ ఉంది. 10 శాతం కంటే ఎక్కువ పాజిటివిటీ రేటు ఉన్న జిల్లాలు కేరళలోనే 11 ఉండగా.. 5 నుంచి 10 శాతం మధ్య పాజిటివిటీ రేటు ఉన్న జిల్లాలు అరుణాచల్‌ప్రదేశ్‌లో 10 ఉన్నాయి. మన రాష్ట్రంలో 12 జిల్లాల్లో 5 శాతం కంటే తక్కువగానే పాజిటివిటీ ఉన్నట్టు కేంద్రం వెల్లడించింది.

అత్యధిక పాజిటివిటీ రేటు అక్కడే.
రాజస్థాన్‌లోని చురు జిల్లాలో వంద టెస్టులు చేస్తే 60కి పైగా పాజిటివ్‌ కేసులు నమోదవుతున్నాయి. దేశంలోనే ఎక్కువ పాజిటివిటీ రేటు ఉన్న జిల్లాగా చురును గుర్తించారు. నాగాలాండ్‌లోని వోఖా జిల్లాలో 51.52 శాతం పాజిటివిటీ రేటు నమోదై రెండో స్థానంలో నిలిచింది. పుదుచ్చేరిలోని మహే జిల్లా 35.94 శాతం పాజిటివిటీతో మూడవ స్థానంలో ఉంది.

ఆగస్టు 3 నుంచి 9వ తేదీ వరకు వివిధ రాష్ట్రాల్లో చేసిన ఆర్టీపీసీఆర్, ర్యాపిడ్‌ యాంటిజెన్‌ టెస్టులు ఇలా..

రాష్ట్రం	ర్యాపిడ్‌ యాంటిజెన్‌	ఆర్టీపీసీఆర్‌
ఆంధ్రప్రదేశ్‌	17,914	3,45,596
అస్సాం	2,31,514	36,520
బిహార్‌	2,96,158	1,08,388
ఛత్తీస్‌గఢ్‌	1,22,046	52,184
గుజరాత్‌	40,044	1,94,608
ఝార్ఖండ్‌	1,03,332	96,344
కేరళ	2,72,310	1,83,587
మధ్యప్రదేశ్‌	1,05,216	1,48,247
మహారాష్ట్ర	4,73,296	5,06,196
పంజాబ్‌	67,726	84,905
రాజస్థాన్‌	38,586	1,23,891
తమిళనాడు	2,394	7,32,331
తెలంగాణ	2,90,829	8,969
కర్ణాటక	1,48,105	5,98,473