ఎన్పీఆర్ సవరణకు కేంద్ర కేబినెట్ ఆమోదం

ఎన్పీఆర్ అప్‌డేట్ కోసం రూ. 3,941.35 కోట్లు కేటాయిస్తూ నిర్ణయం తీసుకుంది. 2020 ఏప్రిల్- సెప్టెంబర్ మధ్య జరిగే ‘జనగణన - 2021’ తొలి దశతో పాటు ఎన్పీఆర్‌ను అప్‌డేట్ చేసే ప్రక్రియ ప్రారంభమవుతుంది. ఎన్పీఆర్ డేటాను సంక్షేమ పథకాల లబ్ధిదారులను ఎంపిక చేసేందుకు ఉపయోగిస్తామని కేంద్ర సమాచార ప్రసార శాఖ మంత్రి ప్రకాష్ జవదేకర్ తెలిపారు.

ఎన్పీఆర్ విశేషాలు

• దేశంలోని ‘సాధారణ నివాసుల’ వివరాలను ఎన్పీఆర్‌లో నమోదు చేస్తారు.
• ఆరు నెలలు లేదా అంతకన్నా ఎక్కువ కాలం పాటు ఒక చోట నివాసం ఉన్న వ్యక్తి లేదా కనీసం రానున్న ఆరునెలలు ఒక ప్రాంతంలో నివాసం ఉండాలని నిర్ణయించుకున్న వ్యక్తిని ‘సాధారణ నివాసి’గా పరిగణిస్తారు.
• మొదట 2010లో ఎన్పీఆర్‌ను రూపొందించగా, 2015లో ఇంటింటి సర్వే ద్వారా దీన్ని అప్‌డేట్ చేశారు.
• 2021 జనాభా గణనకు రంగం సిద్ధమవుతున్న నేపథ్యంలో.. జనాభా పట్టికను సవరించేందుకు తాజాగా నిర్ణయం జరిగింది. అస్సాం మినహా మిగిలిన అన్ని రాష్ట్రాలు, కేంద్రపాలిత ప్రాంతాల్లో ఈ కార్యక్రమం జరగనుంది.

జనగణనకు రూ. 8,754.23 కోట్లు
దేశ జనాభాను లెక్కించేందుకు ఉద్దేశించిన జనగణన- 2021 కార్యక్రమానికి కేబినెట్ ఆమోదం తెలిపింది. ఇందుకు రూ. 8,754.23 కోట్ల అంచనా వ్యయాన్ని ఆమోదించింది.

జనగణన- 2021 విశేషాలు

• ఇది దేశంలో జరిగే 16వ జనగణన.
• స్వాతంత్య్రం వచ్చాక జరుగుతున్న 8వ జనగణన.
• ఈ జనగణన దేశమంతటా చేస్తారు.
• జనగణన రెండు విడతలుగా జరుగనుంది. తొలి దశలో 2020 ఏప్రిల్ నుంచి సెప్టెంబరు వరకు కుటుంబాల గణన, 2021 ఫిబ్రవరి 9 నుంచి 28 వరకు మొత్తం జనాభా గణన ఉంటుంది.
• ఈ జనగణన కోసం మొబైల్ యాప్‌ను ఉపయోగించనున్నారు.