అణుయుద్ధమే వస్తే 12.5 కోట్ల ప్రాణ నష్టం

యూనివర్సిటీ ఆఫ్ కొలరాడొ బౌల్డర్, రట్జర్స్ యూనివర్సిటీలకు చెందిన పరిశోధకులు నిర్వహించిన అధ్యయనం ఈ విషయాలను వెల్లడించింది. ఈ అధ్యయన విశేషాలను ‘సైన్స్ అడ్వాన్సెస్’ అనే జర్నల్‌లో అక్టోబర్ 3న ప్రచురించారు. భారత్, పాక్ యుద్ధం వల్ల సాధారణ మరణ రేటు ఒక్కసారిగా రెట్టింపు అవుతుందని యూనివర్సిటీ ఆఫ్ కొలరాడొ బౌల్డర్‌లో ప్రొఫెసర్ అయిన బ్రయాన్ టూన్ పేర్కొన్నారు.

అధ్యయనంలోని విషయాలు

• భారత్-పాక్ మధ్య అణుయుద్ధం ప్రారంభమైన వారం రోజుల్లోనే 5 కోట్ల నుంచి 12.5 కోట్ల మంది ప్రాణాలు కోల్పోతారు. అది రెండో ప్రపంచయుద్ధం జరిగిన ఆరేళ్లలో జరిగిన ప్రాణ నష్టం కంటే ఎక్కువ.
• రెండు దేశాల మధ్య అపరిష్కృత కశ్మీర్ సమస్య ఉంది. అందువల్ల యుద్ధమే వస్తే భారీ ప్రాణ నష్టం తప్పదు.
• ప్రపంచవ్యాప్తంగా ఈ యుద్ధ ప్రభావం ఉంటుంది.
• రెండు దేశాలు భారీగా ఆయుధాలను పెంచుకుంటున్నాయి.
• ప్రస్తుతం భారత్, పాక్‌ల వద్ద సుమారు 150 చొప్పున అణ్వాయుధాలు ఉన్నాయి. అవి 2025 నాటికి 200 నుంచి 250 వరకు పెరగగలవు.
• అణ్వాయుధ ప్రయోగం వల్ల వెలువడిన 16 నుంచి 36 మిలియన్ టన్నుల సూక్ష్మ కార్బన్ అణువులు(బూడిద) కొన్ని వారాల్లోపే ప్రపంచమంతా వ్యాపిస్తాయి. ఇవి సోలార్ రేడియేషన్‌ను గ్రహించి, గాలిని మరింత వేడెక్కిస్తాయి.
• సూక్ష్మ కార్బన్ అణువుల వల్ల సూర్యరశ్మి భూమిని చేరడం 20 శాతం నుంచి 35 శాతం తగ్గుతుంది. దానివల్ల భూ ఉపరితలంపై ఉష్ణోగ్రత 2 నుంచి 5 సెల్సియస్ డిగ్రీలు తగ్గుతుంది.
• ప్రపంచవ్యాప్తంగా వర్షపాతం 15 శాతం నుంచి 30 శాతం తగ్గుతుంది.