ఆన్‌లైన్, ఆఫ్‌లైన్ రమ్మీపై నిషేధం విధించిన రాష్ట్రం?

ఇందుకు సంబంధించి ఏపీ గేమింగ్ యాక్ట్-1974కు చేసిన సవరణలను రాష్ట్ర మంత్రివర్గం ఆమోదించింది. వెలగడిపూడిలోని సచివాలయంలో సెప్టెంబర్ 3న ముఖ్యమంత్రి వైఎస్ జగన్‌మోహన్‌రెడ్డి అధ్యక్షతన సమావేశమైన మంత్రివర్గం ఈ మేరకు పలు కీలక నిర్ణయాలకు ఆమోదం తెలిపింది.

రెండేళ్లు జైలు శిక్ష...
ఏపీ గేమింగ్ యాక్ట్-1974కు చేసిన సవరణల ప్రకారం... నిషేధం విధించిన రమ్మీ, పోకల్ వంటి జూదం, బెట్టింగ్‌లను ఆడేవాళ్లకు ఆరు నెలల జైలు శిక్ష, నిర్వాహకులకు ఏడాది జైలు శిక్ష, జరిమానా విధిస్తారు. రెండోసారి ఈ తప్పిదానికి పాల్పడితే రెండేళ్లు జైలు శిక్ష, జరిమానా విధిస్తారు.

మంత్రివర్గం ఇతర నిర్ణయాలు...

• వ్యవసాయానికి ఉచిత విద్యుత్‌కు నగదు బదిలీ పథకానికి ఆమోదం.
• గుంటూరు జిల్లా బాపట్ల మండలం మూలపాలెం, జమ్ములపాలెం గ్రామాల్లో ప్రభుత్వ వైద్య కళాశాల ఏర్పాటుకు అవసరమైన 51.07 ఎకరాల భూమి కేటాయింపు.
• ప్రకాశం జిల్లా మార్కాపురం మండలం రాయవరంలో ప్రభుత్వ వైద్య కళాశాల ఏర్పాటుకు అవసరమైన 41.97 ఎకరాల భూమిని కేటాయింపు.
• పంచాయితీరాజ్ శాఖలో మెరుగైన పాలన కోసం ఏర్పాటు చేసిన గ్రామ, వార్డు వలంటీర్లు, సచివాలయ వ్యవస్థలో డివిజనల్ డెవలప్‌మెంట్ ఆఫీసర్స్ (డీడీవో) పోస్టులను ఏర్పాటు చేయాలని నిర్ణయం.
• జాయింట్ కలెక్టర్లకు కింద ఎంపీడీవో (మండల పరిషత్ డెవలప్‌మెంట్ ఆఫీసర్)లకు పైన డిప్యూటీ డెరైక్టర్ కేడర్‌లో డీడీవో పోస్టుల ఏర్పాటు. ఎంపీడీవోలకు పదోన్నతుల ద్వారా డీడీవో పోస్టుల భర్తీ.
• మావోయిస్టు పార్టీ, దాని అనుబంధ సంఘాల మీద మరో ఏడాదిపాటు నిషేధం పొడిగింపు.