బ్యాచిలర్‌ డిగ్రీ పూర్తి చేశారా.. మెరుగైన భవిష్యత్తు కోసం అన్వేషిస్తున్నారా.. సామాజిక సేవకు దోహదం చేసే మార్గాల కోసం చూస్తున్నారా! అందుకు సరైన వేదిక.. టిస్‌–నెట్!! ఆర్ట్స్, సోషల్‌ సైన్సెస్, హ్యుమానిటీస్‌ కోర్సుల ద్వారా విద్యార్థులను తీర్చిదిద్దుతూ.. జాతీయంగా గుర్తింపు పొందిన విద్యా సంస్థ.. టాటా ఇన్‌స్టిట్యూట్‌ ఆఫ్‌ సోషల్‌ సైన్సెస్(టిస్‌).ఈ సంస్థ ఆయా కోర్సుల్లో ప్రవేశాలకు నిర్వహించే పరీక్ష.. టిస్‌–నెట్! ఇందులో ఉత్తీర్ణత ఆధారంగా.. టిస్‌ క్యాంపస్‌లలో వివిధ పీజీ ప్రోగ్రామ్‌లలో చేరొచ్చు! 2022–2023 సంవత్సరానికి సంబంధించి టిస్‌–నెట్–2022కు నోటిఫికేషన్‌ విడుదల చేసింది. ఈ నేపథ్యంలో.. టిస్‌–నెట్‌తో ప్రయోజనాలు, అర్హతలు, ఎంపిక ప్రక్రియ, పరీక్ష విధానం, భవిష్యత్తు అవకాశాలపై ప్రత్యేక కథనం...
- టిస్‌ క్యాంపస్‌లలో ప్రవేశానికి టిస్‌–నెట్
- నాలుగు క్యాంపస్‌లు, 50 పీజీ ప్రోగ్రామ్‌లు
- టిస్‌ కోర్సులతో ఉజ్వల అవకాశాలు
టాటా ఇన్‌స్టిట్యూట్‌ ఆఫ్‌ సోషల్‌ సైన్సెస్.. దేశంలో సోషల్‌ సైన్సెస్ కోర్సుల బోధనలో ముందు వరుసలో నిలుస్తున్న విద్యాసంస్థ. టిస్‌ అందించే పీజీ ప్రోగ్రామ్‌లను పూర్తి చేస్తే.. వినూత్నమైన కెరీర్‌ అవకాశాలు సొంతం చేసుకోవచ్చు. ముఖ్యంగా సామాజిక ఆవిష్కరణలకు సంబంధించిన విభాగాల్లో నైపుణ్యాలు అందుకోవాలనుకునే వారికి చక్కటి వేదిక టిస్‌. టిస్‌–నెట్(టిస్‌–నేషనల్‌ ఎంట్రన్స్‌ టెస్ట్‌)లో ఉత్తీర్ణతతోపాటు ఆ తర్వాత నిర్వహించే ఇంటర్వ్యూలో విజయం సాధించడం ద్వారా టిస్‌ క్యాంపస్‌ల్లో ప్రవేశం పొందొచ్చు!
చ‌ద‌వండి: Career Planning: ఒకే ఒక్క నిర్ణయం.. మీ జీవిత గమనాన్నే మార్చేస్తుంది
4 క్యాంపస్‌లు.. 50 పీజీ ప్రోగ్రామ్‌లు
- టాటా ఇన్‌స్టిట్యూట్‌ ఆఫ్‌ సోషల్‌ సైన్సెస్‌కు ముంబైతోపాటు తుల్జాపూర్, హైదరాబాద్, గువహటిలలో క్యాంపస్‌లు ఉన్నాయి. మొత్తం నాలుగు క్యాంపస్‌లలో 50 పీజీ ప్రోగ్రామ్‌ల్లో ప్రవేశం కల్పిస్తున్నారు. మొత్తం 1501 సీట్లు అందుబాటులో ఉన్నాయి. ముంబై క్యాంపస్‌లో 1,030 సీట్లు, హైదరాబాద్ క్యాంపస్‌లో 216 సీట్లు, గువహటి క్యాంపస్‌లో 135, తుల్జాపూర్ క్యాంపస్‌లో 120 సీట్లు ఉన్నాయి.
- ముంబై క్యాంపస్‌లో.. ఎంఏ స్థాయిలో సోషల్‌ వర్క్, హ్యూమన్‌ రిసోర్స్‌ మేనేజ్‌మెంట్‌ అండ్‌ లేబర్‌ రిలేషన్స్‌ సోషల్‌ ఎంట్రప్రెన్యూర్‌షిప్, ఎడ్యుకేషన్, ఎంఎల్‌ఐఎస్, డెవలప్‌మెంట్‌ స్టడీస్, ఉమెన్‌ స్టడీస్, అప్లయిడ్‌ సైకాలజీ, మాస్టర్‌ ఆఫ్‌ లా, లేబర్‌ స్టడీస్ అండ్‌ ప్రాక్టీస్, మీడియా అండ్‌ కల్చరల్‌ స్టడీస్, ఎంఏ/ఎమ్మెస్సీ (ఎన్విరాన్మెంట్, క్లైమేట్‌ ఛేంజ్‌ అండ్‌ సస్టెయినబిలిటీ స్టడీస్), ఎంఏ/ఎమ్మెస్సీ (రెగ్యులేటరీ పాలసీ అండ్‌ గవర్నెన్స్), ఎంఏ/ఎమ్మెస్సీ(అర్బన్‌ పాలసీ అండ్‌ గవర్నెన్స్), ఎంఏ/ఎమ్మెస్సీ(వాటర్‌ పాలసీ అండ్‌ గవర్నెన్స్), మాస్టర్‌ ఆఫ్‌ హాస్పిటల్‌ అడ్మినిస్ట్రేషన్, మాస్టర్‌ ఆఫ్‌ పబ్లిక్‌ హెల్త్, మాస్టర్‌ ఆఫ్‌ పబ్లిక్‌ హెల్త్ పాలసీ, ఎకనామిక్స్‌ అండ్‌ ఫైనాన్స్, మాస్టర్‌ ఆఫ్‌ పబ్లిక్‌ హెల్త్(సోషల్‌ ఎపిడమాలజీ), ఎంఏ/ఎమ్మెస్సీ(డిజాస్టర్‌ మేనేజ్‌మెంట్‌), ఎంఏ(డెవలప్‌మెంట్‌ పాలసీ, ప్లానింగ్‌ అండ్‌ ప్రాక్టీస్), ఎంఏ/ఎమ్మెస్సీ అనలిటిక్స్‌ కోర్సులు ముంబై క్యాంపస్‌లో ఉన్నాయి.
- హైదరాబాద్ క్యాంపస్‌లో.. ఎంఏ–ఎడ్యుకేషన్, పబ్లిక్‌ పాలసీ అండ్‌ గవర్నెన్స్, డెవలప్‌మెంట్‌ స్టడీస్, నేచురల్‌ రిసోర్స్‌ అండ్‌ గవర్నెన్స్, రూరల్‌ డెవలప్‌మెంట్‌ అండ్‌ గవర్నెన్స్, ఉమెన్‌ స్టడీస్ స్పెషలైజేషన్లతో పీజీ ప్రోగ్రామ్‌లను బోధిస్తున్నారు.
- తుల్జాపూర్ క్యాంపస్‌లో.. డెవలప్‌మెంట్‌ పాలసీ, ప్లానింగ్‌ అండ్‌ ప్రాక్టీస్; సస్టెయినబుల్‌ లైవ్‌లీహుడ్స్‌ అండ్‌ నేచురల్‌ రిసోర్సెస్‌ గవర్నెన్స్‌లో ఎంఏ/ఎమ్మెస్సీ కోర్సులు, సోషల్‌ ఇన్నోవేషన్‌ అండ్‌ ఎంట్రప్రెన్యూర్‌షిప్, సోషల్‌ వర్క్ అండ్‌ రూరల్‌ డెవలప్‌మెంట్‌లో ఎంఏ కోర్సులున్నాయి.
- గువహటి క్యాంపస్‌లో.. కమ్యూనిటీ ఆర్గనైజేషన్‌ అండ్‌ డెవలప్‌మెంట్‌ ప్రాక్టీస్; కౌన్సెలింగ్‌; లైవ్‌లీహుడ్‌ అండ్‌ సోషల్‌ ఎంటర్‌ప్రెన్యూర్‌షిప్‌; పబ్లిక్‌ హెల్త్, ఎకాలజీ, ఎన్విరాన్మెంట్ అండ్‌ సస్టెయినబుల్‌ డెవలప్‌మెంట్‌; లేబర్‌ స్టడీస్ అండ్‌ సోషల్‌ ప్రొటెక్షన్‌; పీస్‌ అండ్‌ కన్‌ఫ్లిక్ట్‌ స్టడీస్; సోషియాలజీ అండ్‌ సోషల్‌ ఆంత్రోపాలజీ స్పెషలైజేషన్లతో ఎంఏ సోషల్‌వర్క్‌ ప్రోగ్రామ్‌ అందుబాటులో ఉంది.
మూడు దశల్లో ప్రవేశ ప్రక్రియ
- టిస్‌ క్యాంపస్‌లు అందిస్తున్న పీజీ ప్రోగ్రామ్‌ల్లో ప్రవేశానికి మూడు దశల్లో ఎంపిక ప్రక్రియ నిర్వహిస్తున్నారు.
- మొదటి దశలో టిస్‌–నెట్, రెండో దశలో టిస్‌ ప్యాట్, మూడో దశలో పర్సనల్‌ ఇంటర్వ్యూ ఉంటాయి.
చ‌ద‌వండి: New Courses in IIM: ఇక్కడ విద్యనభ్యసించిన వారికి... టాప్‌ కంపెనీల్లో ఉద్యోగం
మూడు విభాగాల్లో టిస్‌–నెట్
- టిస్‌ ప్రవేశ ప్రక్రియలో మొదటి దశ టిస్‌–నెట్(నేషనల్‌ ఎంట్రన్స్‌ టెస్ట్‌)ను మూడు విభాగాల్లో నిర్వహిస్తారు.
- ఇంగ్లిష్ ప్రొఫిషియెన్సీ 30 ప్రశ్నలు–30 మార్కులు, మ్యాథమెటిక్స్‌ అండ్‌ లాజికల్‌ రీజనింగ్ 30 ప్రశ్నలు–30 మార్కులు, జనరల్‌ అవేర్‌నెస్‌ 40 ప్రశ్నలు–30 మార్కులకు ఉంటాయి.
- మొత్తం ఒక గంట 40 నిమిషాల వ్యవధిలో నిర్వహించే ఈ పరీక్ష పూర్తిగా ఆన్‌లైన్‌ విధానంలోనే ఉంటుంది.
రెండో దశలో.. టిస్‌–ప్యాట్
- ప్రవేశ ప్రక్రియలో రెండో దశగా పేర్కొనే ఆన్‌లైన్‌ అసెస్‌మెంట్‌లో భాగంగా ప్రోగ్రామింగ్‌ అప్టిట్యూడ్‌ టెస్ట్‌(పీఏటీ)ను నిర్వహిస్తారు. 50 మార్కులకు నిర్వహించే ఈ పరీక్ష రెండు విభాగాలుగా(సెక్షన్‌–ఎ, సెక్షన్‌–బి)గా ఉంటుంది.
- అభ్యర్థులు ఎంచుకున్న స్పెషలైజేషన్‌కు అనుగుణంగా టిస్‌ ప్యాట్‌లో ప్రశ్నలు ఉంటాయి.
- సెక్షన్‌–ఎలో.. ప్యాసేజ్‌ ఆధారిత ప్రశ్నలు ఉంటాయి. ఒక ప్యాసేజ్‌ ఇచ్చి దానికి సంబంధించి మూడు ప్రశ్నలు అడుగుతారు. వాటికి సమాధానం ఇవ్వాల్సి ఉంటుంది. ఇలా మొత్తం 30 మార్కులకు సెక్షన్‌–ఎ పరీక్ష ఉంటుంది.
- సెక్షన్‌–బీలో ఒక ఎస్సే రాయాల్సి ఉంటుంది. దీనికి కేటాయించిన మార్కులు 20.
- కొన్ని స్పెషలైజేషన్లకు సెక్షన్‌–ఎలోనే ఎస్సే రైటింగ్, సెక్షన్‌–బిలో స్టేట్‌మెంట్‌ ఆఫ్‌ పర్పస్‌ రాయాల్సి ఉంటుంది.
మూడో దశ.. ఇంటర్వ్యూ
- టిస్‌ ఎంపిక ప్రక్రియలో చివరి, మూడో దశ ఆన్‌లైన్‌ పర్సనల్‌ ఇంటర్వ్యూ. ఈ ప్రక్రియ 20 నుంచి 30 నిమిషాలపాటు ఉంటుంది. ముగ్గురు సభ్యుల కమిటీ ఈ ఇంటర్వ్యూను నిర్వహిస్తుంది. ఆయా కోర్సులను అభ్యసించేందుకు అభ్యర్థులకున్న ఆసక్తి, సరితూగే తత్వాన్ని పరీక్షిస్తారు.
- ముందుగా అభ్యర్థులు దరఖాస్తు చేసుకున్న స్పెషలైజేషన్‌కు సంబంధించి ఏదైనా ఒక అంశాన్ని ఇచ్చి.. దానిపై వారి అభిప్రాయాలను వ్యక్తం చేయమని అడుగుతారు. సదరు అభ్యర్థులు దానిపై రెండు లేదా మూడు నిమిషాల వ్యవధిలో ప్రజెంటేషన్‌ ఇవ్వాల్సి ఉంటుంది.
- ఆ తర్వాత పర్సనల్‌ ఇంటర్వ్యూ నిర్వహిస్తారు. ఇందులో అభ్యర్థుల నైపుణ్యాలు, ఆసక్తి, సన్నద్ధత తదితర అంశాలను పరిశీలిస్తారు.
- ఈ మూడు దశల్లోనూ విజయం సాధిస్తే సీటు ఖరారు చేస్తారు.
మెరిట్‌ జాబితా.. వెయిటేజీ ఆధారంగా
- మూడు దశల ఎంపిక ప్రక్రియలో భాగంగా.. తుది విజేతలను ఖరారు చేసేందుకు ఆయా దశల్లో చూపిన ప్రతిభకు వెయిటేజీ ఇచ్చే విధానాన్ని అమలు చేస్తున్నారు.
- మొదటి దశ టిస్‌–నెట్‌కు 50 శాతం వెయిటేజీ, ఆన్‌లైన్‌ అసెస్‌మెంట్‌ టెస్ట్‌లో అభ్యర్థుల ప్రజెంటేషన్‌కు 20 శాతం వెయిటేజీ, పర్సనల్‌ ఇంటర్వ్యూకు 30 శాతం వెయిటేజీ కల్పిస్తున్నారు.
- అభ్యర్థులు పొందిన మార్కులను ఇలా వెయిటేజీ ఆధారంగా వంద శాతానికి క్రోడీకరించి మెరిట్‌ లిస్ట్‌ రూపొందిస్తున్నారు.
ఆ రెండు సబ్జెక్ట్‌లకు టిస్‌–మ్యాట్‌
- టిస్‌ అందిస్తున్న ప్రోగ్రామ్‌లలో హ్యూమన్‌ రిసోర్స్‌ మేనేజ్‌మెంట్‌ అండ్‌ లేబర్‌ రిలేషన్స్‌; ఆర్గనైజేషనల్‌ డెవలప్‌మెంట్‌ అండ్‌ ఛేంజ్‌ కోర్సులకు దరఖాస్తు చేసుకున్న అభ్యర్థులు రెండో దశలో ప్రోగ్రామింగ్‌ ఆప్టిట్యూడ్‌కు బదులు ప్రత్యేకంగా నిర్వహించే మేనేజ్‌మెంట్‌ ఆప్టిట్యూడ్‌ టెస్ట్‌కు హాజరవ్వాల్సి ఉంటుంది.
- టిస్‌ మ్యాట్‌లో మూడు విభాగాల్లో(కాంప్రహెన్షన్‌–10 ప్రశ్నలు, బిజినెస్‌ అవేర్‌నెస్‌–10 ప్రశ్నలు, మేనేజ్‌మెంట్‌ డేటా ఇంటర్‌ప్రిటేషన్‌–15 ప్రశ్నలు) పరీక్ష ఉంటుంది. పరీక్ష వ్యవధి 45 నిమిషాలు.
- ఈ మూడు విభాగాల నుంచి ఆబ్జెక్టివ్‌ విధానంలో ప్రశ్నలు అడుగుతారు.
- దీంతోపాటు డిస్క్రిప్టివ్‌ రైటింగ్ పేరుతో ఒక ఎస్సే రాయాల్సి ఉంటుంది. దీనికి 16 మార్కులు కేటాయించారు.
- ఇలా మొత్తం 50 మార్కులకు టిస్‌–మ్యాట్‌ ఉంటుంది.
క్యాంపస్‌ ఆఫర్స్‌
టిస్‌లో పీజీ ప్రోగ్రామ్‌లు పూర్తి చేసుకున్న వారికి క్యాంపస్‌ ప్లేస్‌మెంట్స్‌లో ఆఫర్స్‌ లభిస్తున్నాయి. యూనిసెఫ్, యూఎన్‌డీపీ వంటి ఐక్యరాజ్యసమితి అనుబంధ విభాగాలతోపాటు సేవ్‌ చిల్డ్రన్, ప్రదాన్‌ వంటి సామాజిక సేవా సంస్థల్లో కొలువులు దక్కుతున్నాయి. వీటితోపాటు రిలయన్స్‌ ఫౌండేషన్, కేపీఎంజీ, టాటా క్లాస్‌ ఎడ్జ్, పీడబ్ల్యూసీ, ఉబెర్‌ వంటి కార్పొరేట్‌ సంస్థలు సైతం క్యాంపస్‌ రిక్రూట్‌మెంట్‌ డ్రైవ్స్‌లో పాల్గొని ఆఫర్లు ఖరారు చేస్తున్నాయి. సగటున రూ.5 లక్షల వార్షిక వేతనం లభిస్తోంది.
ప్రిపరేషన్‌ ఇలా
తొలి దశ టిస్‌–నెట్‌లో రాణించడానికి అభ్యర్థులు ఇంగ్లిష్ ప్రొఫిషియన్సీ, మ్యాథమెటికల్‌ అండ్‌ లాజికల్‌ రీజనింగ్, జనరల్‌ అవేర్‌నెస్‌ అంశాలపై దృష్టిపెట్టాలి.
ఇంగ్లిష్ ప్రొఫిషియన్సీ
అభ్యర్థుల్లోని ఇంగ్లిష్ నైపుణ్యాలను పరిశీలించే ఈ విభాగంలో రాణించడానికి సెంటెన్స్‌ కరెక్షన్, అనాలజీస్, సినానిమ్స్, యాంటానిమ్స్, గ్రామర్, వెర్బల్‌ రీజనింగ్, రీడింగ్‌ కాంప్రహెన్షన్‌లలో పట్టు సాధించాలి.
మ్యాథమెటికల్‌ అండ్‌ లాజికల్‌ రీజనింగ్
ఈ విభాగంలో మెరుగైన మార్కులు సాధించడానికి అర్థమెటిక్, జామెట్రీ, ట్రిగ్నోమెట్రీ, స్టాటిస్టిక్స్, నంబర్‌ సిరీస్, డేటాఇంటర్‌ప్రిటేషన్, లాజికల్‌ రీజనింగ్‌లను ప్రాక్టీస్ చేయాలి.
జనరల్‌ అవేర్‌నెస్‌
- ఈ విభాగానికి సంబంధించి రాజకీయాలు, సోషల్‌ స్టడీస్, సైన్స్‌ అండ్‌ టెక్నాలజీ, ఎన్విరాన్మెంట్, స్పోర్ట్స్, ఆర్ట్స్ అండ్‌ కల్చర్, భారతదేశ చరిత్రపై దృష్టి పెట్టాలి.
- ఇంగ్లిష్, మ్యాథమెటిక్స్‌కు సంబంధించి అభ్యర్థులు పదో తరగతి స్థాయి పుస్తకాలను చదవడం ద్వారా అవగాహన పొందొచ్చు.
- జనరల్‌ అవేర్‌నెస్‌కు సంబంధించి సమకాలీన అంశాలు, 12వ తరగతి వరకు ఎన్‌సీఈఆర్‌టీ సోషల్‌ పుస్తకాలను అధ్యయనం చేయడం ఉపయుక్తంగా ఉంటుంది.
టిస్‌–నెట్–2022 ముఖ్య సమాచారం
- టిస్‌–ముంబైతోపాటు హైదరాబాద్, తుల్జాపూర్,గువహటి క్యాంపస్‌లలో పీజీ ప్రోగ్రామ్‌లలో ప్రవేశానికి నిర్వహించే పరీక్ష టిస్‌–నెట్.
- అర్హత: బ్యాచిలర్‌ డిగ్రీ ఉత్తీర్ణత ఉండాలి. చివరి సంవత్సరం చదువుతున్న విద్యార్థులు కూడా దరఖాస్తు చేసుకోవచ్చు. కొన్ని ప్రోగ్రామ్‌లకు ప్రత్యేక అర్హతలు నిర్దేశించారు.
- దరఖాస్తు విధానం: ఆన్‌లైన్‌లో దరఖాస్తు చేయాలి.
- ఆన్‌లైన్‌ దరఖాస్తులకు చివరి తేదీ: ఫిబ్రవరి7,2022
- టిస్‌–నెట్ హాల్‌ టికెట్‌ డౌన్‌లోడ్‌: ఫిబ్రవరి 14–21
- టిస్‌–నెట్ ఆన్‌లైన్‌ టెస్ట్‌ తేదీ: ఫిబ్రవరి26,2022
- పూర్తి వివరాలకు వెబ్‌సైట్‌: https://admissions.tiss.edu
చ‌ద‌వండి: మెరుగైన భవిష్యత్‌కు...విలువైన మల్టీడిసిప్లినరీ కోర్సు..
