సబ్జెక్ట్ పరంగా అత్యుత్తమ డిగ్రీ.. పీహెచ్‌డీ

ప్రోత్సాహకాలు:
సీఎస్‌ఐఆర్-నెట్‌లో జేఆర్‌ఎఫ్ అర్హత సాధించిన వారు ఐఐటీలు, నిట్‌లు, అన్ని పరిశోధనశాలలు, యూనివర్సిటీల్లో పీహెచ్‌డీలో చేరవచ్చు. దీని ద్వారా ఐదేళ్ల పాటు ఫెలోషిప్ లభిస్తుంది. మొదటి రెండేళ్లు నెలకు రూ.16,000 చెల్లిస్తారు. ఏడాదికి ఒకసారి కాంటిన్‌జెన్సీ గ్రాంట్‌గా రూ. 20,000 చెల్లిస్తారు. ఆ తర్వాత మూడో సంవత్సరంలో సీనియర్ రీసెర్చ్ ఫెలోషిప్ (ఎస్‌ఆర్‌ఎఫ్) హోదా కల్పించి నెలకు రూ. 18,000 చెల్లిస్తారు. అంతేకాకుండా సీఎస్‌ఐఆర్ నెట్ పరీక్షలో మంచి మెరిట్ మార్కులు సాధించిన విద్యార్థులకు డాక్టర్ శ్యామ్‌ప్రసాద్ ముఖర్జీ ప్రత్యేక ఫెలోషిప్‌ను ఐదేళ్లు అందిస్తారు. దీనిద్వారా మొదటి రెండేళ్లు నెలకు రూ. 20,000 స్టైఫండ్ ఇస్తారు. మూడో ఏడాది నుంచి నెలకు రూ.24,000 ఇవ్వడంతోపాటు ఏడాదికి రూ. 70,000 కాంటిన్‌జెన్సీ గ్రాంట్ కూడా చెల్లిస్తారు. నెట్‌లో జేఆర్‌ఎఫ్‌నకు ఎంపికైన అభ్యర్థులకు యూజీసీ నిబంధనల మేరకు ఐదేళ్ల పాటు ఫెలోషిప్ లభిస్తుంది.

స్వీయ పరిశీలన:
దేశంలో పీహెచ్‌డీలో చేరిన విద్యార్థుల్లో 50శాతానికిపైగా మాత్రమే తమ థీసిస్‌ను సమర్పిస్తున్నారు. ఈ నేపథ్యంలో సదరు కోర్సులో చేరడానికి మనం ఎంత వరకు సిద్ధంగా ఉన్నామో స్వీయ పరిశీలన చేసుకోవాలి. ఇందుకు పరిగణనలోకి తీసుకోవాల్సిన అంశాలు.. పీహెచ్‌డీ పూర్తి చేయడానికి ఎక్కువ సమయం కేటాయించాల్సి వస్తుంది. కాబట్టి తదనుగుణంగా అవసరమైన వనరులు, సమయాన్ని కేటాయించగలమా?లేదా? అనే చూసుకోవాలి. ఎంచుకునే అంశం, సంబంధిత గైడ్ వంటి విషయాల్లో స్పష్టంగా ఉండాలి. పరిశోధన చేయాలనుకుంటున్న అంశంపై నెలకోసారి ఆర్టికల్స్ ప్రచురితమయ్యేట్లు చూసుకుంటే ప్రయోజనకరం. ఎంచుకున్న టాపిక్‌పై సమగ్ర సినాప్సిస్ రాసి, గైడ్‌తో ఫైనలైజ్ చేయించుకోవాలి.

సొంతంగా పరిశోధనలు:
పీహెచ్‌డీ కోర్సుల ముఖ్య ఉద్దేశం.. నూతన జ్ఞానాన్ని పెంపొందించడం. నిబద్ధత, అంకితం, పట్టుదల ఈ మూడు గుణాలు ఉంటేనే పీహెచ్‌డీ కోర్సును విజయవంతంగా పూర్తిగా చేయగలం. పీహెచ్‌డీ అంటే తన సంబంధిత సబ్జెక్ట్‌లో స్వతంత్రంగా పరిశోధనలు నిర్వహించే నైపుణ్యాన్ని సొంతం చేసుకోవడం. ఇందుకోసం సబ్జెక్ట్‌పై విస్తృతంగా అధ్యయనం చేయాలి. సంబంధిత సబ్జెక్టులో అప్పటికే పరిపూర్ణ నైపుణ్యం సాధించిన ప్రొఫెసర్/గైడ్ పర్యవేక్షణలో పరిశోధన కొనసాగించాలి. ఇక్కడ ఒక విషయం గుర్తుంచుకోవాలి. పీహెచ్‌డీ అనేది అనేది స్వతాహాగా ప్రేరణ పొందుతూ పూర్తి చేయాల్సిన కోర్సు. గైడ్ ఉన్నప్పటికీ..అతని పాత్ర పరిమితంగానే ఉంటుంది. కాబట్టి సొంతంగా నేర్చుకోవడంపైనే పూర్తిగా దృష్టిసారించాలి.

కీలకం:
పీహెచ్‌డీ చేసే క్రమంలో మూడు దశలు కీలకం. అవి.. సమస్యను గుర్తించడం (పరిశోధనకు తగిన అంశాన్ని ఎన్నుకోవడం),దానికి పరిష్కార మార్గాన్ని కనుక్కోవడం, దాన్ని సమర్ధవంతంగా ప్రెజెంట్ చేయడం. ఒక కొత్త ఆలోచన ద్వారా మాత్రమే ఒక అంశాన్ని ఎన్నుకోవడం సాధ్యమవుతుంది. అదే క్రమంలో దాన్ని పరిష్కారించడానికి విస్తృత అధ్యయనం, పరిశోధనలు చేయాలి. వాటి ఆధారంగా వచ్చిన ఫలితాలను ప్రభావవంతంగా ప్రెజెంట్ చేసే నైపుణ్యం సొంతం చేసుకోవాలి. ఈ క్రమంలో కనీసం ఐదు నుంచి ఏడు అసైన్‌మెంట్లు చేపట్టాలి (సబ్జెక్ట్‌ను బట్టి మారుతు ఉండొచ్చు). ఇందులో కనీసం ఒక సెమినార్ లేదా రీసెర్చ్ పేపర్ అయిన ఉండాలి. ఏ సబ్జెక్‌లో పీహెచ్‌డీ పూర్తి చేసినా సంబంధిత థిసిస్‌ను మాత్రం ఇంగ్లిష్‌లోనే సమర్పించాలి. ఈ మేరకు యూజీసీ నిబంధనలను తప్పనిసరి చేసింది.

ఎన్నో రకాలు:
పీహెచ్‌డీకి సంబంధించి పలు రకాల కోర్సులు అందుబాటులో ఉన్నాయి. వీటిని ఇంటిగ్రేటెడ్-పీహెచ్‌డీ, పార్ట్‌టైమ్ పీహెచ్‌డీ కోర్సులుగా వ్యవహరిస్తారు. డిగ్రీ అర్హతతో ఎంఎస్సీతోపాటు పీహెచ్‌డీ చేసే అవకాశాన్ని కొన్ని ఇన్‌స్టిట్యూట్‌లు క ల్పిస్తున్నాయి. ఈ కోర్సులనే ఇంటిగ్రెటెడ్ పీహెచ్‌డీలుగా పేర్కొంటారు. ఐఐఎస్సీ- బెంగళూరు, జేఎన్‌సీఏఎస్‌ఆర్-బెంగళూరు,ఐఐఏ, ఐఐటీలు ఈ తరహా కోర్సులను అందిస్తున్నాయి. పని చేస్తూ పీహెచ్‌డీ చేయాలనుకునే వారి కోసం కొన్ని ఇన్‌స్టిట్యూట్‌లు పీహెచ్‌డీ కోర్సులను ప్రత్యేకంగా అందిస్తున్నాయి. వీటిని పార్ట్‌టైమ్ పీహెచ్‌డీలుగా వ్యవహరిస్తారు. ఫుల్‌టైమ్ పీహెచ్‌డీని 3 ఏళ్ల నుంచి 6 ఏళ్లలో, పార్ట్‌టైమ్ పీహెచ్‌డీ 4-7 ఏళ్లలో పూర్తిచేయాలి.ఐఐటీలు, బిట్స్ వంటి ఇన్‌స్టిట్యూట్‌లు ఈ తరహా కోర్సులను అందిస్తున్నాయి. ఐఐఎం, పలు బిజినెస్ స్కూల్స్ నిర్వహిస్తున్న ఎఫ్‌పీఎం, పీహెచ్‌డీ మధ్య ఎలాంటి వ్యత్యాసం లేదు. ఎంబీఏకు పీజీడీఎంకు మధ్య ఉన్న తేడానే ఈ రెండు కోర్సుల మధ్య ఉంటుంది.

ఓపెన్‌కు నో:
యూజీసీ-2009 మార్గదర్శకాల మేరకు ఎంఫిల్/పీహెచ్‌డీ కోర్సులను ఓపెన్ విధానంలో పూర్తి చేయడానికి వీలు లేదు. యూజీసీ-2009 మార్గదర్శకాలు, నిబంధనలకు లోబడి కొన్ని ఓపెన్ యూనివ ర్సిటీలకు మాత్రం పీహెచ్‌డీ/ఎంఫిల్ కోర్సులను దూర విద్యా విధానంలో నిర్వహించేందుకు అనుమతిస్తారు. ఈ క్రమంలో పీహెచ్‌డీ చేసే విద్యార్థి ప్రిన్సిపల్ గైడ్ అదే ఓపెన్ యూనివర్సిటీకి చెంది ఉండాలి. అవసరమైన పక్షంలో జాయింట్ గైడ్ వేరే యూనివర్సిటీ నుంచి ఉండొచ్చు.

ప్రయోజనం
తనకిష్టమైన రంగంలో విస్తృత పరిశోధనల చేయడం ద్వారా సంబంధిత సబ్జెక్ట్‌లో నిష్ణాతులుగా మారొచ్చు. పీహెచ్‌డీ కోర్సులు పూర్తిచేసిన అభ్యర్థులు ఆయా విద్యా సంస్థల్లో ఫ్యాకల్టీగా విధులు నిర్వర్తించవచ్చు. విశ్వవిద్యాలయాలు, ఐఐటీలు, నిట్‌లు వంటి ఉన్నత విద్యా సంస్థల్లో మెరుగైన వేతనంతో ఉద్యోగాల్లో స్థిరపడొచ్చు. జూనియర్ సైంటిస్ట్‌గా సీనియర్ శాస్త్రవేత్తల వద్ద పనిచేసే అవకాశం లభిస్తుంది. ప్రస్తుతం చాలా కంపెనీలకు సొంతంగా ఆర్ అండ్ డీ విభాగాలున్నాయి. పీహెచ్‌డీ చేసిన వారికి వీటిలో అవకాశాలు లభిస్తాయి. సొంతంగా పరిశోధన ప్రాజెక్టులు చేపట్టొచ్చు. సంస్థలను ఏర్పాటు చేయొచ్చు. పీహెచ్‌డీతో కెరీర్‌ను ప్రారంభిస్తే నెలకు రూ.35 వేలకు తగ్గకుండా వేతనం లభిస్తుంది.

ఉస్మానియా యూనివర్సిటీ పీహెచ్‌డీ నోటిఫికేషన్:
అర్హత: సంబంధిత సబ్జెక్ట్‌లో 55శాతం మార్కులతో పీజీ.
ప్రవేశం: రాత పరీక్ష, ఇంటర్వ్యూ ద్వారా (సీఎస్‌ఐఆర్-నెట్, యూజీసీ-నెట్,ఐసీఎంఆర్, ఐసీఏఆర్, డీబీటీ-జేఆర్‌ఎఫ్,ఇన్‌స్పైర్ ఫెలోషిప్, టీచర్ ఫెలోషిప్, ఏపీసెట్, జెస్ట్‌లలో అర్హత సాధించిన/ రెగ్యులర్‌గా ఉస్మానియా వర్సిటీ నుంచి ఎంఫిల్ పూర్తి చేసిన అభ్యర్థులకు ప్రవేశ పరీక్ష నుంచి మినహాయింపు) ఆన్‌లైన్
దరఖాస్తుకు చివరి తేదీ: ఆగస్టు 10, 2014 (రూ. 400 లేట్ ఫీజుతో ఆగస్టు 20)
వివరాలకు: ouadmissions.com
గమనించాల్సినవి: