టెన్త్ పరీక్షా విధానంలో మార్పులు తెచ్చిన అధికారులు, దీనికి అనుగుణంగా విద్యార్థులు సన్నద్ధం అయ్యేందుకు సమయం ఇవ్వకుండానే జూలైలో పరీక్షలు నిర్వహించాలని నిర్ణయించారని పేర్కొంటూ కాకినాడకు చెందిన సొసైటీ ఫర్ బెటర్ లివింగ్ సంస్థ అధ్యక్షుడు టి.భవానీ ప్రసాద్ ఈ వ్యాజ్యాన్ని దాఖలు చేశారు. ఈ వ్యాజ్యంపై బుధవారం న్యాయమూర్తులు జస్టిస్ ఆకుల వెంకట శేషసాయి, జస్టిస్ బొప్పూడి కృష్ణమోహన్‌లతో కూడిన ధర్మాసనం విచారణ జరిపింది. ప్రభుత్వ న్యాయవాది వాదనలు వినిపిస్తూ, అసలు ఈ వ్యాజ్యానికి విచారణార్హతే లేదన్నారు. విద్యార్థులు, వారి తల్లిదండ్రులకు లేని అభ్యంతరం పిటిషనర్‌కు ఎందుకన్నారు. పిటిషనర్ తరఫున న్యాయవాది మతుకుమిల్లి శ్రీవిజయ్ వాదనలు వినిపించారు. ఈ వాదనలు విన్న ధర్మాసనం, పూర్తి వివరాలతో కౌంటర్ దాఖలు చేయాలని ప్రభుత్వాన్ని ఆదేశించింది. ఇందులో భాగంగా విద్యాశాఖ ముఖ్య కార్యదర్శి, కమిషనర్, ప్రభుత్వ పరీక్షల డెరైక్టర్‌లకు నోటీసులు జారీ చేసింది. తదుపరి విచారణను జూన్ 24కి వాయిదా వేసింది.